UNIVERSITY OF MICHIGAN MUSEUM OF ZOOLOGY
Home > Research > PolyCone Project > Maimiimiraa i Huahine
Tetepa 2022 – Maimiimiraa i Huahine, taamotu Totaiete
[Huriraa reo tahiti/Huriraa reo farani/Huriraa reo marite]
I te avae no tetepa matahiti 2022, ua rave o Diana Vergara raua o Tom Duda i te tahi mau maimiimiraa i te fenua no Huahine. Ta raua fa, te haapapuraa ia te mau vahi pae tahatai ei reira te mau pupu. Ua haaputu mai raua i te tutae o te pupu, maa vahi iti io atoa e te tahi mau huero. Ua roaa mai ia raua te mau haapapuraa i nia i te atinu (parauhia na roto i te reo tipee te ADN) o teie mau pupu. E ravea tera no te iteraa te maa amuhia e taua animara ra, e ravea haapapuraa atoa i te mau hioporaa matamua. Maoti teie mau hiopoaraa atinu (ADN), ua tapura hia te mau huru pupu taae roa. Ua ite atoa hia te mau huru pupu e ofaa nei i tera area tau i te raveraa hia te mau hiopoaraa.
Hou to raua tere i Huahine, ua farerei o Diana e o Tom ia Tamatoa Bambridge, Serge Planes e ia Tiphanie François i te pu maimiraa a te CRIOBE i Moorea. I reira to ratou tauaparauraa i nia i te opuaraa PolyCone. Ua haere atoa raua e mataitai i te vahi faaamuraa pupu (mai tei patahia i nia i te hohoa i nia mai).
E vahi huru aano ta raua i hiopoa i te pae aau, piri noa i te oire pu no Fare (a taumi i o nei no te pata i te hohoa fenua Google Maps o tera vahi). E itehia taua vahi ra i nia i te hohoa i nia mai. Ua hiopoa atoa hia te tahi atu vahi i Maeva (a taumi i o nei no te pata i te hohoa fenua Google Maps o tera vahi). I roto i taua na vahi toopiti, ua rau te huru vahi faaearaa o te mau pupu itehia mai. No te mea hoi aita te huru o te pupu i Maeva i taae i to Fare, ua tautoo noa o Diana e o Tom i ta raua ohipa i Fare.
Ua roaa mai i na taata maimi e piti rave rau huru pupu ta raua i faito e i tuu tataitahi i roto i te farii faaihia i te miti. I nia i te farii, ua papai hia iho a te mau haamaramaramaraa no tera e tera pupu. I nia i te hohoa i nia ae, te itehia nei i roto i te farii te pupu Conus pulicarius (i te pae aui), te pupu Conus eburneus (i ropu) e te pupu Conus coronatus (i te pae atau). E ite pinepine hia na pupu matamua, te Conus pulicarius e te Conus eburneus, i te vahi oneone i te vahi papau. E ite ohie atoa hia raua ia tae i te po, no te mea, tei te po raua e amu ai.
Hou a faaora faahou hia ai ratou i roto i te miti, ua vaiiho hia te mau pupu i roto i te farii tau mahana ia roaa mai to ratou tutae. Ua piri i te 15-20% o te pupu i titio (no te mea aita i maoro roa te taime a amu hopea ai ratou, aore ra, no te mea ua i noa to ratou vairaa maa).
I muri ae i te faitoraa, ua pata o Diana raua o Tom i te hohoa o te pupu. Te faaite nei te hohoa i nia te faanahoraa o te pataraa hohoa. Ua pata pauroa hia te hohoa o te mau pupu. E pae pupu tei ravehia i nia i te huru pupu tataitahi. No te rahiraa o ratou, ua hopoi faahou hia ratou i te vahi i reira ratou te raveraa hia. No te mau pupu ua roaa mai to ratou titio e maa vahi o to ratou io, e mea faufaa roa te mau hohoa patahia, no te mea, penei ae, te vai ra i rotopu ia ratou te tahi mau huru pupu taae roa.
Ua iriti mai o Diana e o Tom maa vahi io i nia i te taatoaraa o te mau pupu, e ravea fifi ore teie no te pupu. Ia faaora faahou hia te pupu, e nehenehe ona e ora faahou mai tana i matau na mua ae. I nia i tera mau vahi io, e hiopoahia te atinu (ADN) no te haapapu tei hea ra te huru pupu taae.
I nia i tera hohoa i nia, rave rau hohoa pupu tei patahia no Fare mai. E toru huru Conus imperialis e hoe Conus textile.
Ua piri i te 1 000 pupu ta Diana raua o Tom i faito, 22 huru pupu te taatoaraa. Ua piri i te 200 tutae e 200 atoa vahi io i roaa mai. Ua afaihia tera mau titio e vahi io i te pu maimi UM no te hiopoaraa i te atinu (ADN). E maha atoa pute huero i noaa mai, e au e, na te pupu Conus miliaris e te pupu Conus sanguinolentus i ofaa i tera huero. E tia iho a ra e hiopoa i te atinu (ADN) o taua mau huero ra no te haapapu na vai i ofaa e no te faito atoa ra i to ratou faito matahiti. O te Conus pulicarius te pupu ite rahi hia i Fare, mai tatou e ite ra i nia i te hohoa i nia ae.
Te hinaaro nei te manao e haamauruuru maitai i te mau taata tei rohi e tei tauturu mai no teie ohipa : te tavana oire no Huahine o Marcelin Lisan e tana aporaaa oire ; Malissa Itchner e Nelson Tepa tei faaohie i te faatupuraa o te hoe rururaa opuaraa PolyCone i roto i te aporaa oire ; Christophe Brocherieux no te Faatereraa hau o te arutaimareva no Porinetia Farani ; Tamatoa Bambridge, Serge Planes e Tiphanie François no te CRIOBE ; Ben Hess e Taehwan Lee no te UM ; Em e Rande, Isabelle, Didier, MJ e te taatoaraa o te mau hoa ta maua i farerei atu i te roaraa o teie raveraa.
E hoi i nia roa